Баянаагийн блог

Удахгүй Сэлэнгэ рүү аялнаа.

2010-08-09T03:01:00.006+08:00

За даа өөрийн блогтоо гар хүрэх битгий хэл нээж ч харахгүй хэдэн өвөл, хавар, зун, намрыг ардаа оруулжээ. Бусад хүмүүс яасан бол гэсэн чинь хэвээрээ бичиж байцгаанаа... гэхдээ хурд нь саарсан юм шиг... үүнийг би зарим зүйлтэй холбож дараа нэг блогтоо хэдэн мөр тэмдэглэнээ. Энэ блогчдын хажууд би хэн билээ дээ... зүгээр уншигч шүү дээ. :) Удахгүй Сэлэнгэ рүү аялах аялалыг зохион байгуулах даалгаврыг авсан байгаа. Тэгээд нөхөд рүү уриалж, уруу татах зорилгоор бичсэн и-мэйлээ энд оруулчий гэж бодлоо.

Тун удахгүй ирэх Баасан гариг буюу VIII/13-15 өдрүүдэд Капиталын зуны аялалыг Сэлэнгэ аймгийн Хүдэр сумын байгалийн үзэсгэлэнт газар, дээхэн үед дарга сайд нар очиж амарч, ан гөрөө хийдэг байсан сайхан нутаг руу хийх гэж байна. Аялалын талаар дэлгэрэнгүй мэдээллийг ЕНБД Б.Мөнхнаран илүү тодорхой болгож удахгүй хүргүүлэх байх. Энэ аялалын маршруттай танилцана уу. Энэ удаагийн аялалыг гишүүд нэлээн сонирхож байгаа бөгөөд идэвхтэй оролцох байх гэж үзэж байна.

Урьд жилүүдийн аялалыг сонирхуулвал:

2006 онд Өмнөговь аймаг руу ПАЗ (ПАУЗ гэж нэрлэвэл зохих ч байх) автобустай маш сайхан аялалыг хийсэн. Одоо ч тэр автобусыг тээврийн товчоон дээрээс харж болох байх шүү. Яривал нэлээн урт и-мэйл болох тул тэр үеийн авч байсан байгалийн зургуудыг эвлүүлсэн видеог харна уу. Аялалын зургийг удахгүй оруулнаа. Капиталын нэлээдгүй зурагнууд байдаг ч тухайн үед зарим гишүүдэд өгч, авалцаж байгаагүй... сүүлд шинээр орсон гишүүд маань тэр бүр мэдэхгүй. хараагүй байгаа. Эдгээрийг нэг заваараа нэт-рүү хуулюу гэж санаад байна. Тэр үед энэ аялалыг зургуудыг сонирхоорой.
2007 онд бидний 11 гишүүд (тухайн үед 11 шонхорууд гэж дуудагдаж байлаа) Хэнтийн нурууны үргэжлэл уулуудын дунд байрлах Хагийн хар нуур руу явганаар аялж байлаа. Энэ аялал багагүй зориг тэвчээр, хатуужлыг шаардсан хүнд аялал болж байсан. Үнэхээр амар байгаагүй. Шонхорууд маань хэлэх байх. Аялалын зургийг үзээд бас нэгийг бодох бий. Гэхдээ зорьж алхаж очоод нуурын эрэг дээр амарч байсан... буцаад унаагүй болсон үедээ хадланчдын гал дээр очоод баярлаж байсан шиг сэтгэгдэл болоод мэдрэмжийг миний хувьд одоо мэдэрч чадаагүй л байна. Тэр үеийн аялалын талаар Хүрлээгийн оруулж байсан мэдээ, одоо ч гэсэн бичиж байгаа сэтгэгдлүүдийг уншиж сонирхоорой.
2008 онд Богд уулын ноён оргил Цэцээ гүний оройд гарах аялалыг хийж байлаа. Сэрдамбыг мөнгө, Бадар-Ууганы алтан медаль авахыг Цэцээ гүний оргил дээрээс гар утсаар шууд сонсож, хамтдаа төрийн дууллаа дуулж байсан азтай хүмүүс биднээс өөр байгаагүй ээ. Кевин маань энэ талаар одоо ч хүртэл 'Би ч өөрийгөө азтай гэж тооцдог. Гэхдээ тэнд зөндөөн монголчууд байсан... гэтэл та нар шиг азтай хүмүүс өөр хаана ч алга' гэж хэлдэг. Энэ зургуудыг ч гэсэн удахгүй үзээрэй.
2009 онд Хэнтий аймгийн Мөнгөнморьт сумын нутагт Гурван голын бэлчир хэмээх сайхан нутаг руу машаанаар аялж байсан. Ажилтай байгаад явж чадаагүй болохоор зурагуудыг хараад бас явсан хүмүүсийн яриаг сонсоод битүүхэндээ атаархдаг юм.

Өнөө жил Сэлэнгийн Хүдэр рүү явах аялалд заавал явах болноо. Дэгээтэй нь дэгээгээ, буутай нь буугаа, майхантай нь майханаа аваад ажлын алжаалаа тайлж сайхан сэргээд ирцгээе ээ.

HAPPY NEW YEAR 2008

2007-12-28T15:08:00.000+08:00

Ширхэглэн будрах цагаан цастай
Чимэглэн гоёсон ногоон гацууртай
Ширээ тойрсон хайртай хүмүүстэйгээ
Шинэ оноо сайхан угтаарай

АРДЧИЛАЛ...

2007-12-19T08:39:00.001+08:00

АРДЧИЛАЛ гэсэн үгийн утгыг тайлбар толиос дараа нэг харъя байз. Саяхан болсон Ардчилсан холбооны 18 жилийн ойд зориулсан видеод үнэхээр дажгүй илэрхийлсэн байнаа. Хэлэх нэг ондоо байнаа. Аа гэхдээ бодох юм их байгаа шүү дээ. Хүсэж байсан эрх чөлөөндөө одоо хүртэл хүрсэн үү гэдэгт хувийн зүгээс жаахан эргэлзэж байдаг юмаа.

Гадаа цас орж байна.

2007-11-24T13:38:00.000+08:00

Гадаа цас орж байна. Энэ өвлийн шинэхэн цас. Өглөө гэрээс гараад ажил руу явж байхад бүх юм өөр болсон мэт, шив шинэ болсон юм шиг, толгой дотор эргэлдэх олон бараан бодол арилсан мэт санагдах юм. Энэ цасанд учир байна уу?...

Би цас их унасан ойд жаахан ч гэсэн алхмаар санагдаад байгаа юм. Өвлийн ойд очиж байгаагүй л дээ. Тэр агшныг хальсанд буулгаж авах юмсан гэж бодогдоод байгаа. Заавал явнаа.

...Удахгүй шинэ жил болно. Өнгөрсөн шинэ жилээр найзууддаа хүргэж байсан мэндчилгээгээ холбочихлоо. Шинэ жил тэгээд өвлийн улирал хамгийн гоё нь юм уу даа...

24 цагийн цэрэг

2007-09-29T12:02:00.001+08:00

"24-цаг" гээд үйл ажиллагаа Капитал Жэй Си- ийн маань уламжлалт ажлын нэг болоод 3 дахь удаагаа явагдах гэж байна. Тун удахгүй бид 24 цагийн цэрэгт явна. Нэг хоногийн хугацаанд цэргийн амьдралаар амьдарнаа гэдэг үнэхээр сайхан юм билээ. Өнгөрсөн жилийн зургуудаас эвлүүлснээ тавилаа.

Өмнийн говиор аялахуйд

2007-07-28T20:25:00.000+08:00

Ноднин Capital JC -ийнхэн маань Өмнөговь руу аялал хийсэн юм. Зарим нэг зургуудийг эвлүүлж нөхөддөө стрестсэн үедээ үзэж бай гэснийгээ блогтоо тавьчихяа. Энэ удаа бид Хагийн хар нуур руу явганаар аялна. Үзэж, харах зүйл бишгүй л байгаа байхаа гэж бодож сууна.

Наадам хэр болов? Нэг сайхан ярилцая л даа.

2007-07-16T21:53:00.000+08:00

Наадмын талаар дараа уулзахдаа нэг сайхан ярьж болох боловч БЛОГ-оороо бүүр сайханаар яримаар санагдаад...

За найзуудаа. Наадмаар яажшүүхэн баярлав даа. Нээг сайхан ярилцая л даа.

БӨХ: Барилдаж ноцолдсон хүн байна уу? Эсвэл дэмжиж тэтгэсэн хүн байна уу? Энд цолны найраа хэрхэн хийсэн талаараа нээг сайхан яриач. Миний хувьд цэнгэлдэхэд угаасаа УВС гэхээр ойлгомжтой Гантогтох, Ганбат, Одгэрэл...Бямбажав гээд хэдээ дэмжээд л хувцасныхаа захыг мушгиад суулаа. Бардаггүй ээ дээ. Хатуухан хэлэхэд бяр нь дууссан уу? тоолдог дууссан уу? бүү мэд ... буянаараа л болог. цаана нь өчнөөн сайхан залуучууд байна даг. Ер нь нутгийнханаа дэмжиж хардаг нь монголын ёс болоод байгаа биз дээ. За тэгээд бусад нутгийн том цолтонгууд адилдаа адилдаа. Сайхан барилдаан үзэхэд тэр жилийн хийморь сэргэх шиг болдог. Энэ жил харин ч дэмий харж суулаа. За тэгээд Өсөхөө ч ёстой харин гүрийдэг этгээд байна шүү. Миний мэдэхийн энэ жилтэйгээ нийлээд 3 дахиа начны даваанд ойчоод гүрийж байна. Энэ жил яагаад ч цэнгэлдэхэд байгаа багаар бодоход 20000 ширхэг нүдийг, тэр олон камерийг гүрийгээд дийлсэнгүй дээ гэж. Сумьяа бол Өсөхөөгөө бөгсөөрөө унасанаас хойш аль хэдийн далай аваргын тэмдэг зүүгээд нисэж яваад нэг сайхан залууд Заан өгч буян боллоо доо. Их аварга дүүгээсээ сурах юм ч их байна даа. Түрүүлсэн Мөнхбаатар Арслан цолондоо эзэн болоод явах байхаа гээд найдаж байна. Харахад бяртай сайхан залуу л байна лээ. Ямар барилдаж үзсэн биш дээ ч гэх шиг. хэхэ. Начин болсон 7,8 залуучуудын хэд нь үнэн хүчээрээ давсаныг бурханаас асуугаад ч хэлж таашгүй. Учир нь үнэн хүчийг үзүүлээд давсан байлаа ч хэдэн саяыг хаясан бол гэж өөрөөсөө эхлэж асууна. Дараа хажуудахаасаа асууна. Цаашлаад уулзсанаасаа асууна. Начны даваанд өөрийн хүчээрээ давсан ч өмнө нь 3,4-ийн даваанд өгсөн байж таарсан байвал яах уу? гэж. За ямартаа ч монгол бөх энэ хэдэн цолтонгуудаар дуусахгүйгээс хойш шинэ залуу үе гарч ирэхээ зарлаад сануулаад байгааг дэмжин хүлээж авах нь зүйтэй байхаа.

МОРЬ: Уясан хурдан буян тань хэдээр давхив аа? Уяач нөхөд хэн хэн байна аа? Үүнийгээ нэг сайхан зарлаач... Миний хувьд морийг бол зурагтаар үзээд түрүүлж ирж байгааг нь хараад хамрын самсаагаа шархируулж суулаа. Тоосонд очиж даруулж шороо царайлмаар санагдавч ирж очих замын түгжрээнээс халшраад болчихлоо. Элдэв будилаангүй сайхан уралдлаа гэх. Гэсэн чинь бас хэдэн ажнай замдаа эндсэн бол гээд хэрэгт дурлаад ... Даага гэсэн чинь эхээсээ өндөр биетэй эрлийзүүд уралдаж байнаа. Буруу зөвийг нь та нар хэл дээ. Би моринд дуртай л даа. Багадаа 3 жил наадмын морь унаж байлаа. Бас уяж байлаа. Яг одоо бол учиргүй мэддэг юм шиг яриж бас чадахгүй тул та үргэлжлүүлээд бичээрэй.

СУР: Харваж намнадаг хүмүүс байна уу? Зурагтаар харж байхад баатрын хувцастай харваач нар байна лээ. Зүгээр санагдсан шүү. Харин сүүлийн хасааг цэнгэлдэхэд харвуулахад үзэж байгаа хүмүүс байсан уу? Нээх их тоохгүй байх шиг санагдсан. За тэгээд та өөрөө үргэлжлүүлээд бичихээ мэднэ шүү дэ.

ХУУШУУР: Наадамдах гэж цэнгэлдэхийг нэг тойроод хуушуур идээд харихыг хэлдэг гэж төрийн томчуудаас эхлээд яриад байх юм. За юу л бол? гэж боддог байлаа. Үнэхээр хуушуурнаас өөр идэх юм алга доо. Тэр тусмаа шороотой, тоостой нь идэх бүүр янзтай. Яалт ч үгүй. Та байсан бол бас л тэгнэ дээ. Яаж зогсож байгаад идэхэв дээ? гээд арай соёлтойгоор идэе гэвэл сахиж сууж байгаад сандлаа хувааж байгаад ч хамаагүй идэх нь сайхан байлаа гэж. Миний бодлоор хэрвээ болдогсон бол цэнгэлдэхийн гаднахыг компани, хүмүүст өгмөөр байна. Тэд зүлэгжүүлэг дээр үйлчилгээ явуулаг. Эцсийн дүндээ гэр бүлээрээ очоод сайхан зүлгэн дээр суугаад ямар ч хамаагүй хуушуур идээд харьж л байвал. Хамгийн чухал нь үлээхийн төдийх салхинд боссон шороо нь нөгөө гоёоод очсон улсуудын маань хувцас байг ээ, сайхан наадам үзье гэсэн сэтгэлийг шороогоор дарахгүй болчвол уу?

ЖУУЛЧИД: Гаднаас жуулчид авч ирж байгаа компаниуд тэдэндээ хэлмээр юумаа? Хаанаас, хаагуур яваад ирсэн нь мэдэгдэхгүй хэдэн улсуудад манай наадамд ядаж хиргүй хувцастайгаа очих остой гэдгийг хэлмээр байна. Монгол хүн баяр наадамдаа бие, сэтгэл, хувцасаа бэлдээд очдог. Тэгвэл ноохой, хиртэй хувцастай хэдэн баагйи хажууд чинь суугаад байвал яах уу?

Дэнж байтугай дэлхийг хотойлгомоор монгол наадмынхаа талаар нээг сайхан ярилцая л даа. Тэгэх үү аан?

Баяртай инээд...

2006-11-18T12:43:00.000+08:00

Гурван өдрийн өмнө манай ажил дээр охиноо дагуулсан, сугандаа ороож хуйлсан зүйл сугавчилсан нэг ах орж ирлээ. Өөрийгөө танилцуулж мэнд усаа мэдэлцсэний дараа надад хандаж өөрийнхөө хэрэг зорилгыг хэлье ажилд чин саад болоогүй биз гэж надаас асуулаа. Тэр ахыг суугаад ярилцая гэж хэлээд сандал руу зааж дараа нь юуны тухай юм бол гэж бодлоо. Яг тэр үед янз бүрийн тус дэм болооч гэж зовлонгоо ярьж явдаг хүмүүсийн нэг нь юм болов уу гэж бодсоноо хэлье. Тэр ах хуйлж боосон арьсан дээр сийлж зурсан 3 зургаа үзүүлж хэрхэн бүтээсэнээ, зураг дээрх деталь болгоноо ямар билэгдэлтэй болох, утга учир болгоныг нь тайлбарлаж байх зуур тухайн зураг болгонд ямар их хүч хөдөлмөр шингэснийг нь харж ойлгож байв. Нэг зураг нь эвийн билэгдэл болсон Тумбаш буюу эвтэй дөрвөн амьтаныг бумбын орны олбогон дээр залжээ. Мөнхөд төгсгөлгүй үргэжлэх түмэн наст хээг цохиж товойлгон суурь хийж өгсөнөө өөрөө надад тайлбарлаж хэлж байгаа нь энэ хүн лав хүний хийсэн юмыг зараад явдаг хүн биш байхаа гэх бодлыг төрүүлсэн юм. Чулуун будгаар будсан гэх юм. Арилдаггүй юм гэнээ. Хуруугаа норгож байгаад зүлгэлээ жаахан будаг болж байна. Удах тусмаа цааш нь шингэж бэхжээд сайхан болноо гэж байна.

Дараачийн зураг нь “Их нүүдэл”. Та бүхэн санаж байгаа бол 500,1000–тын мөнгөн дэвсгэртийн ард байдаг гэр тэрэгний зураг. Гэхдээ тэрэн дээр дутуу байдаг зүйлийг нэмж тусгасан гэж байна. Тухайлбал хатны гэр тэрэг. Мөн гэр тэрэгний модон дугуйг даган гүйж шанагаар тос хийж явдаг байсан хүүхдүүдийг тусгажээ. Одоогийнхоор техникийн “товуд” юм уу даа. Өмнө нь Чингис хааныг морь унан хөлөг баатруудтайгаа алсыг заан ярилцан яваагаар сийлжээ. Сийлэх гэснээс арьсан дээр сийлэх гэдэг нь маш чимхлүүр ажил гэнэ. Арьсаа цааш нь цоолохгүйгээр хээг сийлнэ гэдэг нүд, гарын мэдрэмж шаардсан ажил юм байна.Үүлний, газрын, хад, бутны хээг нааш нь товойлгон хийсэн нь нарийн юмаа.

Бас нэг зураг нь Өгөөдэй хааны Хархорум-д дэлхийн улсуудаас урьж бас олзолж авч ирсэн урчуудаар хийлгэсэн Мөнгөн модон оргилуур ажээ. Бас л 5000, 10000-тын мөнгөн дэвсгэр дээр байдаг. Чулуун хана, мод, цаад хааны асар зэрэг нь гарт мэдрэгдэж байнаа. Зарим хүнд хэлвэл энгийн л байдаг нэг зураг, бүтээл ш дээ гэж хэлэх байх даа. Гэтэл тэр хүн миний хийсэн олон бүтээл гадаадынхан 200-500$-р аваад явдаг байсан. Одоо би бүтээлээ гадагш нь гаргахгүй. Миний юм бүтээх чадал дундархад үүнийг би хийсэн юмаа гээд хүмүүст зааж өгөөд явж байх нь хүсэл минь байнаа. Эмч намайг удаан юм хийж болохгүй гэсэн гээд нүдээ үзүүлж байна. Би чамд өөрийн олон хоног суусан хөдөлмөрөө үнэлэхгүйгээр зөвхөн материалын үнээр нь заръя гэж хэллээ.

Би тэр Тумбаш-тай зургийг лав л дор хаяж 10-аад хоног хийх байх гэж бодож байлаа. Мөн дээрээс нь өөрийнхөө нүд, гараа чилээн байж суусанаа яагаад энэ хүн үнэлэхгүй байгаа нь сонин санагдаад байсан юм. Гэхдээ би тэр хүний хэлсэн үнэ-нд нь биш, хийсэн бүтээлийнх нь сайханд нь биш (байдаг л нэг зураг л даа) түүнийг хийхэд нэлээн хөлс хүч, гол нь цаг хугацаа зарцуулсан даа гэж бодоод дотроо авчихдаг ч юм уу гэж бодож байсан юм. Ах нь одоо жаргалын найман морийг яг эх загвараар нь хийж байгаа (эх загвар нь Үндэсний түүхийн музейд байдаг юм гэнэ) гээд надад жижигхэн зураг үзүүллээ. Сарын дараа дууснаа тэгэхээр нь авч ирж үзүүлж болноо гэж хэлсэн. Тэгээд би Тумбаш-г чинь авъя гээд хэлсэн мөнгийг нь өгсөн. Тиймэрхүү зураг дэлгүүрүүдээр лав л 3-4 дахин үнэтэй байдаг байхаа. Зарим нь ч арьсан дээр зүгээр л будгаар зурсан байгаа байх аа.

Яагаад та ийм олон хоног зарцуулсан бүтээлээ ингэж хямд зарах гээд байгаа юм бэ? гэж би асуусан. Тэр ах охин луугаа харснаа өнөөдөр охины маань төрсөн өдөр болоод мөнгө хэрэгтэй болоод байнаа гээд охин руугаа харж миний охин хэд хүрч байгаа билээ гэж асуухад охин нь 9 гэж хэлсэн.

За тэгээд баярлалаа, дараа ирж шинэ зургаа үзүүлнээ гээд баяртай энэ тэр болсны дараа гадаа коридорт аав охин 2-ын баярласан инээд хоорондоо тоглоод инээлдээд гарч байгаа нь сонсогдсон юм. Тэр охины инээд одоо ч гэсэн надад сонсогдож байна. Би өмнө нь тийм зураг энэ тэр юмс зараад явдаг хүмүүсийг харж л байсан л даа. Гэхдээ тэдний буруу нь юу байхав дээ. Гэм нь хараажийн муу юмыг бас өндөр үнэ хүргэх гээд байдаг шүү.

Тэр ах гадуур зургаа зараад явдаг хүний нэг байж болох ч би шууд тэгж ч бас бодож чадахгүй байна. Ямар ч байлаа гэсэн би аав охин 2-т жаахан ч гэсэн тус болсон юм байна шүү дээ гэж өөрийгөө зөвтгөж, урамшаад байна. Аав охин 2-г баярлуулсанаа блогтоо тэмдэглэхгүй бол санаа минь амрахгүй нээ. Би баяртай байнаа. Магадгүй би тийм зургийг тэрнээс ч гоё зургийг дэлгүүрээс авсан бол лав ингэж баярлахгүй байсан байхаа гэж бодогдоод байгаа.

IT Meeting-ийн талаар

2006-11-01T19:53:00.000+08:00

Өчигдөр Мягмар гаригийн уулзалтанд оролцонгоо бодогдсон бодлоо хуваалцая. Магадгүй буруу зөрүү, ташаа бичсэнийг минь буруушаахгүйгээр уншаад дуусгаарай. Энэ миний л бодол шүү. Дараа өөдрөгөөр харж бичнээ.

Өвөл байхаа нэг очиж байснаас хойш бас ч хүү ганц хоёр уулзалтууд болсон гэнэ. Туршилтаар авсан IT инженерийн суурь шалгалтанд нам тавиулсан бололтой. Их дээд сургуулийн хичээлийн хөтөлбөрт анхаарах цаг нь болжээ гэдэгтээ аль эртнээс санал нэг байснаа хэлье. МУИС-ийн сурагчид Японы коллежуудын дунд зохиогддог програм хангамжийн уралдаанд оролцоод тусгай байрын шагнал хүртээд иржээ. Сайхан мэдээ. Хүжий маань Хятад руу ASOCIA-н форумд оролцож ирээд сонин хачинаасаа хуваалцаж байнаа. Гадаад арга хэмжээнд хоцрохгүй оролцоод байгаа найздаа талархая. 2008 онд нөгөө Билл Гейтс-н барааг ч гэсэн харах боломж тохиох юм байна шүү.

МХХТГ-с хэрэгжүүлж буй МХТ-н тайлбар толийн төслийн талаар багагүй л маргалдлаа. Өмнө нь яригдаж байсан зүйлсээ яриад байна уу гэж л ойлголоо. Хэлэлцүүлэг хийлгэх гээд 10000-аад үг бэлдсэн, вебээ бэлэн болгосон гэтэл серверийн асуудал, цаашаа хөгжүүлэх хүн нь Япон явсан, орчуулж тайлбар оруулж байгаа хүний мэргэжлийн талаасаа чадвар нь ямар вэ? Зэрэг яриад байгаа нь жаахан тиймхэн, ажил нь уялдаагүй бас төлөвлөлт муу юм шиг санагдлаа. За тэгээд гэх мэт багагүй үл ойлголцлууд байдаг л бололтой.

Эдгээрийг түр орхиод өөрт бодогдсоноо бичье. Ер нь бид ICT-н энэ хэдэн үг, нэр томъёололыг нэг тийш нь болгоод дараагийн ажил руугаа орсон нь дээр юм шиг. Миний мэдэхийн л 3 дахь жилдээ явж байна. Вебээр нээлттэй хэлэлцүүлээд таарч тохирох тайлбарыг нь редакторууд нь батлаад яваад байсан бол өдийд нилээн хүний сонорт хүрэх байж ээ. Сая л гэхэд домайныг нь ч сонсож хоцорч чадсангүй. Уул нь монголын гэсэн wikipedia байвал ч. Дөлмандах энэ тал дээр өөрөө ажиллах боломжтой,туслая гэснийг сайшаах хэрэгтэй санагдсан. Хийе бүтээе гэсэн хүмүүсийг дор нь дэмжээд хамтрах л дутагдаад байна уу даа. Ийм хүмүүсээ эрж хайдаггүй, эсвэл мэдээллээ хуваалцдаггүй нь зэрэг дутагдлууд бас байнаа. Тийм болгохыг зорьж яваа хүмүүстээ амжилтыг хүсье. Мөн заавал монголчилж тайлбарлаж ойлгох гэх ямар шаардлага байнаа? гэж эсэргүүн бодож явдагаа энэ дашрамд бас хэлээд авъяа гэж бодлоо.

Бас нэг зүйл. Бид МХТ- салбар гээд зорилго, зорилтуудаа тодорхойлоод ажиллаж байгаа. Энэ цомхон бөгөөд манайдаа залуу салбарыг бүрдүүлэгч бид хамтарч ажиллаж чадаж байна уу? Гээд нэг асуумаар байна. Эсвэл ажиллаад эхэлчихсэн үү? Нэлээн зүйл хийгдэж байгааг мэдэж байгаа ч нөгөө л эрх чөлөөт монгол зан ханхлаад байгаа нь мэдрэгдээд байх шиг. Магадгүй шилжилтийн үе гэж байдаг бол тэр нь байгаасай.

TO DO LIST

2006-10-30T20:42:00.000+08:00

Post нэмэхдээ 2-н 2 удаа давтан бичнээ гэж байх уу даа. Яг publish хийх гэтэл лайтай тог тасраад үнэхээр уурлах ч хэцүү, уйлах ч хэцүү юм боллоо. Save хийгээгүй миний буруу л даа. Буцаж ороод өмнөх бичлэгээ сэргээгээд авчих шидтэй товчийг олж харсангүй ээ. Байдаг байж магадгүй юү? Ингээд дахин бичье.

Үнийг би өөрөө олоод мэдээд бичиж байгаа биш бөгөөд мэдсэн зүйлээ бусадтайгаа хуваалцаж сур гэдэгтэй санал нэг байдаг тул зочин танд зориулан бичлээ. Миний бие гишүүн нь болж байдаг "CAPITAL JC" ТТБ маань уржигдар Тэрэлж-УБ2 -д намрын чуулганаа хийсэн бөгөөд нөхдийн маань бидэнд заасан сургалтын хэсгээс уламжил яаа.
Бас нэг бичих болсон шалтагийг өдөөгч нь Хүжий маань мэдээллийг хурдан түгээж байнаа. Мөн намайг зоригжуулсан комментууд байна.

Нөхдийнхөө хөдөлмөрийг үнэлээд To do list-г өмнө нь өөрийн гараараа шивсэн боловч энэ удаа лайтай тогноос болоод unicode converter ашигласанаа нуухгүй ээ. :)

TO DO LIST

Өдөр бүр 40 минут агаарт алхах
20 минут ганцаар байж эргэцүүлэн бодох
Зорилгоо тодорхойлох
Дэмий зүйлд санаагаа зовоохоо больж, хийж бүтээхэд анхаарах
Бусдад санаа тавьж, хуваалцаж байх
Өдөр тутамд өөрийн үнэ цэнээ нэмэгдүүлэх зүйл хийж байх
Өдрийн эцэст өнгөрсөн өдрийг эргэцүүлэн дүгнэж бай
Оройн хоол унтах хоёрын хооронд дор хаяж 120 минут байх шаардлагатай
Өдөрт 7 цаг унтаж байх
Дэргүй унтаж байх
Унтахын өмнө маргааш өдрөө төсөөлж төлөвлөх
Гэр бүлдээ өдөрт нэг цагийг заавал зориулах
Ирээдүйдээ зориулж заавал хуримтлал хийж байх
Өөрийн кареерийн хөтөлбөрийг жил бүр боловсруулж мөрд
Аливааг хийж байхдаа яах гэж хийж байгаагаа бодож байх
Дор хаяж дараагийн 45 (уул нь 90 хоног) хоногийг төлөвлөж байх
Жил бүр нэг хүнийг хөгжүүлэх

Би эдгээрээс уншаад аль алиныг нь хэвшүүлж чадсан билээ гээд эргэцүүлсэн чинь яана даа гэж бодогдсон шүү. :)

Таныг ч бас юу ч бодохгүйгээр гүйлгээд уншчихна гэдэгт итгэж яадаад л байна.

хэхэ. Бичиж байх явцдаа өөрөө ч мэдэлгүй Save хйиж байлаа. "Тог"-оо гэж...

Нэг л аргаа олохгүй байна даа.

2006-10-30T16:28:00.000+08:00

Блог уншдаг болсон маань эртнийх. Блог нээсэн маань саяхных. Блогтоо юм оруулахгүйгээр нэлээн удлаа. Гэхдээ баахан ноорог байнаа. Нэг л учраа олж чадахгүй байна даа. Хүмүүс бичээд байдаг. Би празитлаад уншаад баймааргүй байна. Блогоо амьд байлгахын тулд энэ олон ажлыг бас нэг тийш нь цэгцлэх хэрэгтэй байдаг. Энэ талаар нөхөд та нар туслаарай гэж хүсье. Бага багаар юм нэмээд л байя гэж бодож байна. :)
Үхэр тэргээр туулай гүйцэх болов уу?

Талд мандаж буй өглөөн наран

2006-10-14T20:05:00.000+08:00

Өглөө эрт босож мандаж буй нарыг үнэхээр харж чаддаггүй байлаа. Энэ зун говь руу нөхдийн хамт явахдаа 2 ч өглөө нарыг барьж авсан даа. Үнэхээр сонин, гоё юм билээ. Өглөөн нарыг тосож харж чадвал тэр өдрийн ажил бүтэмжтэй байдаг гэхээр нь ядаж блог-доо тавиадхая гэж бодоод орууллаа. Та бүхний ажил өөдрөг байг хэмээн ерөөе. Мэдээж миний desktop background-д энэ зураг байнга байгаа. :)

Блог-той болъё гэж шийдлээ,

2006-09-27T21:23:00.000+09:00

Блогийн тухайд өмнө нь үнэхээр цагийн дайсан гэж үзээд хагас жил гаруйн хугацаанд огт сонирхолгүй зөвхөн ажил ажил гэсээр иржээ. Саяханаас хүмүүсийн блогуудыг сонирхож уншиж үзлээ. Заримыг нь ч бүр өдөрт цаг гарвал юу бичсэн бол? гэж тогтмол нээж шалгадаг болох шинжтэй. Тэгээд ер нь өөрийн блогтой болох нь зөв юмаа гэж шийдлээ. Яагаад заавал гэж бас бодож үзлээ. Бусдынхаа бичсэнийг /шимэгч хорхой адил/ чимээгүйхэн уншаад яваад байх нь жаахан тиймхэн санагдаад...
Өчигдөрхөн нэг залуугийн Хишгээ бичсэнийг Цаг, завын тухай хэдэн үг уншаад сэтгэл шулуудснаа хэлэх нь зөв байхаа. Та бүхэнтэй өөрийн бодлоо хуваалцахдаа сэтгэл хангалуун байх болноо.